(147) காதல்..காதல்..காதல்..காதல் போயின் "நோ" சாதல்-2

காதல் பண்பு வர கண்ட்யூஸிவ் சூழல் முதலில் அவசியம். சின்னத் தூறல் மழை, வானவில், அருவி, கலகலப்பான திருவிழான்னு இதெல்லாம் காதல் பண்பை ஆம்ப்ளிபை செய்து ஒருநபரின் காதல் "அவஸ்தை" என்பதைத் தீவிரப்படுத்தும்.

எனக்குச் சின்ன வயது ஈர்ப்பு, பள்ளிக்கூடக் காதல், கல்லூரிக்காதல் அமையவில்லை.
நான் வளர்ந்த காலம் அப்படிக் கொடுமையானது! ராஜேந்தரின் ஒருதலைராகம், கிளிஞ்சல்கள், இரயில் பயணங்களில், வாழ்வே மாயம், பயணங்கள் முடிவதில்லை, என வெள்ளிவிழாக் காதல் படங்களில் வந்த ஹீரோக்கள் எல்லாம் காதலில் தோற்று, தாடி வளர்த்து வித விதமான கேன்சர் நோய் தாக்கி, இரத்த வாந்தி எடுத்து க்ளைமாக்ஸில் செத்தார்கள்!

காதல் என்றால் அது அழுக்கு தாடி + கேன்சரைக் கேரியரில் ஏற்றிக்கொண்டு காதல் வயப்பட்டவரை ரத்தம் கக்க வைக்கும் காட்டேறி ரேஞ்சில் என்னைச் சிந்திக்க வைத்தது! ஹார்மோன்களின் ஹார்மோனியம் பயத்தால் கேட்கவில்லை அல்லது கேட்காத மாதிரி ஓவர் லுக் செய்து வந்தேன்!

90களின் ஆரம்பத்தில் கோடம்பாக்கதில் கேன்சர் காதல் கதைகளுக்குக் கேன்சர் வந்து இரத்தவாந்தி எடுத்து ஹீரோ கட்டாயமாகச் சாகும் காதல் தோல்விப்படங்கள் காணாமல் போயின! இதயம் மாதிரி படங்கள் உதயம் தியேட்டரில் பார்த்ததால் மூலையில் வீசப்பட்டிருந்த ஹார்மோன் ஹார்மோனியம் இருபதுகளின் ஆரம்பத்தில் இசைக்க ஆரம்பித்தது!


கெட்டும் பட்டணம் சேர் என்ற மூதுரைப்படிக் கெடாமலே பட்டணமான சென்னைக்கு வந்ததும், சென்னை வாழ்வியலுடன் தினமும் செய்த போராட்டம் இரண்டாண்டுகளிலேயே ஒரு பெரிய நம்பிக்கையைத் தந்தது! நம்பிக்கை வந்தாலே பயம் காணாமல் போகும்.


வேலையில் உழைத்துச் சொந்தமாய் ரெண்டு காசு சம்பாதித்து, உணவு, உடை, உறைவிடத்துக்கு எவரையும் சார்ந்திருக்காமல் சுயமாய் இருக்க ஆரம்பித்திருந்ததால் பாய்ஸ் படம் வராதபோதே 1992லேயே "எனக்கொரு கேர்ள்ப்ரண்ட் வேணுமடா"ன்னு ஹார்மோன்ஸ் என்னுள் காதல் ராகம் வாசித்தது!

"இந்தக்கால இளைஞர்கள் காதலுக்கு இளையராஜாவின் பாட்டிருக்கு" எனும் உண்மைப்படி இளையராஜாவின் பாடல்கள் எல்லாம் ரெடியாகத் தொகுத்துக் கேட்டு யாராவது ஃபிகர் மாட்டினால் "மயங்கினேன் சொல்லத் தயங்கினேன்..உனை விரும்பினேன் உயிரேன்னு" உளறிக்கொட்டி அமைக்கும் காதல் ராஜாங்கத்துக்கு நானே ராஜா நானே மந்திரியா இருக்கணும்கிற "அர்ஜ்" எனக்குள்ளே...


நரம்படி நாகப்பன் எனும் புனப்பெயர் கொண்ட என் ராமாபுர நண்பன் பல்லவனில் போகும் ஃபிகர்களை புட்போர்டில் பயணித்து மடக்குவது எப்படி? என்று லைவ் டெமோ தந்தான்! அவன் எனக்குச் சொன்ன காதல் பால பாடங்களின் நோட்ஸை 16 ஆண்டுகள் கழித்து என் நினைவில் இருந்து எடுத்து வைக்கிறேன்.

1. ஒரே பஸ்ரூட்டில் தொடர்ந்து ஒரே நல்ல ஃபிகர் பயணிப்பதை ஒருவாரம் கவனிக்கவேண்டும்.

2.இப்போ உடனே ஆக்சனில் இறங்கவேண்டும். நம் கையில் இருக்கும் லஞ்ச் பேக்கை புட்போர்டுக்கு அருகில் இருக்கும் கடைசி ஜன்னல் ஓர இருக்கையில் இருக்கும் ஃபிகரிடம் தந்துவிட்டு புட்போர்டில் தொங்கவேண்டும்!

3. ரெண்டுரூபாய் டிக்கெட் எடுக்கச் சொல்லிப் பத்துரூபாய் தரவேண்டும். தந்துவிட்டு அடுத்த ஸ்டாப்பில் டிக்கெட் வருமுன் இறங்கிவிட வேண்டும்.

4. மறுநாள் கொஞ்சம் மறைவாய் இருந்து அந்தப் பெண் வரும் பஸ்ஸை நோக்கினால் அதில் அந்தப் பெண் முதல் நாள் டிக்கெட் எடுத்த மீத சில்லறையை வாங்காத இந்த சில்லறையைக் கண்களால் அந்த பஸ் ஸ்டாப்பில் தேடுவாள்!

5.இப்போது ஃபிகரிடம் பேச சந்தர்ப்பம் வந்தாச்சு! வண்டியில் ஓடி ஃபுட் போர்டில் ஏறிக்கொண்டு சாரிங்க வண்டி ஸ்பீடா எடுத்துட்டான்! அதான்.அ..ஆ..இ...ஈ என்று பேச்சு ஆரம்பிக்கலாம்! இதுக்கு அப்புறம் உன்னோட திறமைம்மா! அப்படின்னான் நம்ம நண்பன்!

எனக்கு இது டீப்பான ரிஸ்க்கா தெரிஞ்சுது! இதெல்லாம் வேலைக்கு ஆகாதுன்னுட்டேன்!
நண்பன் எடுத்த காதல் டியூஷன் வேஸ்ட் செய்ததற்காக நண்பர்கள் பொதுக்குழுவில் நான் பெனல்ட்டி டீ ஸ்பான்ஸர்ஷிப் செய்யப் பணிக்கப்பட்டேன்!

டீப் ரிஸ்க் டீ+பொறையோட போச்சேன்னு டீப் ப்ரீத் விட்டு யோசிக்கையில்

ரொம்ப ஆதரவா இன்னொரு நண்பன் ஒரு சைதாப்பேட்டைச் சிங்கம் நீ பொதுமாத்து அடிவாங்கிடுவோமோன்னு பயப்படுறேன்னு பல்ஸைப்பிடித்து ஒய் ரிஸ்க்... தெரிஞ்ச பொண்ணு இருந்தா டிரை செய்! அப்படின்னு என்னிடம் போட்டு வாங்கிய சில தகவல் படி, என்னை ஹீரோ ஆக்குவது என்று பல்லவன் டிப்போ பாடிகாட் முனீஸ்வரர் மீது சபதமிட்டு எனது ஹேர் ஸ்டைலிஸ்ட், காஸ்ட்யூம் டிஸைனர் / காஸ்ட்யூம் கொடையாளர் , வெல் விஷர் என டி.ராஜேந்தர் மாதிரி எட்டு துறையை கையாண்டு டைரக்ஷனை ஆரம்பித்தான்!

சில மாதங்களுக்கு காதல் ப்ரிப்பரேஷன் ப்ரைமர் டிரைனிங் கோர்ஸ் ஃபீஸாக மாலை நேர டீ-பொறை, பொண்ணுகிட்டேர்ந்து பாஸிடிவ் ரெஸ்பான்ஸ் வந்தா பெரிய டிரீட் ஸ்பான்ஸர்ஷிப் கைமாறாக நான் செய்யவேண்டியது எனும் ஜெண்டில்மேன் அக்ரீமெண்டுடன் ஆரம்பமானது என் ப்ராஜக்ட் காதல்! (ஏழரைச் சனி உச்சத்தில் இருந்து என்னைப்பாடாய்ப் படுத்தியது என்றும் கொள்ளலாம்:-))


அடுத்த பதிவுகளில் சந்திக்கலாம். கொஞ்சம் சீரியஸ்.. நிறையக் காதல் கோமாளித்தனங்களுடன்..

அன்புடன்,

ஹரிஹரன்